Die oudste tegniese skool in die RSA!
Die Hoër Tegniese Skool Daniel Pienaar is op 2 April 1895 op Uitenhage gestig met die doel om in 'n behoefte aan tegniese onderwys in die Oos-Kaap te voorsien. Vanaf hierdie klein begin, met 30 seuns, het die skool gegroei tot een van die bekendste skole in Suid-Afrika. As oudste Tegniese skool in die RSA, is 'n baie groot bron van oudskoliere opgebou. Daar bestaan 'n baie sterk band van kameraderie en lojaliteit tussen die oudskoliere onderling, asook met die skool.
Die skool geniet ook baie goeie ondersteuning vanuit die breë Uitenhage en Port Elizabeth gemeenskap en daar heers 'n baie sterk prestasieverwagting van almal wat bekend is met die skool. Dit is 'n groot aansporing vir die personeel en huidige Tiere - Daniel Pienaar leerders staan vir baie jare al bekend as "Die Tiere". Die skool is 'n paralelmedium, ko-ed skool (Afrikaans- en engelsmedium onderrig vir seuns en dogters). Die leerdertal in 2012 is 850 (755 seuns en 95 dogters.) Die groot aantal skoliere wat loopbane as ingenieurs, tegnici, vakmanne, mediese dokters, lektore, predikante en sakemanne volg, getuig van die wye beroepskeuse wat die opvoedingsprogram by Daniel Pienaar aan 'n jong mens bied.
Die belangrikheid van tegniese onderwys in die RSA word beklemtoon deur die feit dat die Suid-Afrikaanse ekonomie huidiglik 'n groot tekort aan kritiese tegniese vaardighede ervaar. Daar is jaarliks 'n tekort aan ±700 ingeneurs en 7 500 gekwalifiseerde vakmanne. Ons is daarom oortuig dat Daniel Pienaar die ideale omgewing bied waarin leerders gestimuleer word om onder andere, ingeneurs en gekwalifiseerde vakmanne te word. Ongeag die omstandighede en eise, bly die eindproduk van Daniel Pienaar "Volkome Toegerus"!
Baie dankie dat u ons webwerf besoek!
| Protea Straat |
| Uitenhage |
| 6229 |
| South Africa |
| 041-922 9990/4 | |
| 041-922 9339 | |
| admin@danielpienaar.co.za |
